masail e ghusal

Sawal: ghusal k kitney faraiz hain?

Jawab: ghusal k kul 3 faraiz hain 1) munh mein paani daal k garaara karna 2) naak mein kachi haddi tak paani pohnchana 3) puray badan ko is tarah dhona k baal barabar jagah b khushk na rahy.

Sawal: Agr ghusal k aakhir mein kulli yaani garaarey aur naak mein paani dalna yaad aye to kiya karna chahye?

Jawab: bhool janey ki surat mein jab yaad ajaey us waqt hee munh aur naak mein paani daal lein to bhi ghusal ho jaey ga.

Sawal: ramzan mein gharaarey aur naak mein paani dalney ka hukum?

Jawab: ramzan mein garaarey aur naak mein paani dalney ki zaroorat nahi q k is tarah roza toot janey ka andesha ho sakta hai begair in k bhi ghusal ho jaey ga.

Sawal: ghusal kharey ho kar ya beth kar ya khuley medaan mein karney ka hukum?

Jawab: pardey mein kaprey utaar kar aur beth kar ghusal karna zyada behtar hai aur agr mard khuley medaan mein ghusal kary to naaf se ghutnon tak apna satar dhaanp kar ghusal kary kyun k satar kholna haraam hai.

Sawal: gehray aur jaari paani mein ghusal kesy karain?

Jawab: gehray aur jaari paani mein kulli aur naak mein paani daal leny k baad dubki laga leny se bhi ghusal adaa ho jaey ga.

Sawal: haiz k baad paak honey k liye kia kiya jaey?

Jawab: haiz k baad paak honey k liye najaast ko dho leny k baad bus ghusal kar liya jaey to paaki haasil ho jaey gi.

Sawal: kiya orat k liye tamaam baalon ka dhona zaroori hai?

Jawab: sar k tamaam baal dhona farz hai puraney zamaney mein oratein sar k baal goondh liya karti thi yani mendhniyan si ban jati thi aisi surat mein sirf baalon ki jarr tak paani pohncha dena kaafi hota tha magr ajkal baal aam tor per khuly rakhti hain is liye tamaam baal dhona farz hai warna ghusal na hoga.

Sawal: train mein ghusal kesy karain jab k sirf wuzoo jitna paani ho?

Jawab: agr ghusal k liye paani mojood na ho to tayammum kar liya jaey is mein b 3 sharait hain (1) train k kisi dabbey mein bhi itna paani ghusal jitna mojood na ho. (2) raasty mein ek meel k andar koi station na ho jahan paani ka mojood hona maloom ho. (3) train k takhton per itni matti jami ho jis se tayammum ho sakey...agr in mein se koi shart na paai jaey to jis tarah mumkin ho us waqt to namaz parh lein lekin baad mein ghusal kar k woh namaz lotana zaroori hai.

Sawal: ghusal ki haajat ho to roza rakhna aur khaana peena aur bartan wagera ko hath lagana kesa hai?

Jawab: haath munh dho kar kha pee lein aur roza rakh lein ghusal baad mein kar lein janaabat ki halat mein khana peena makrooh nahi hai aur bartan ko hath laganey se wo b napaak nai hoty.

Sawal: ghusal e janaabat mein taakheer karna kesa hai?

Jawab: ghusal e janaabat mein itni takheer karna k namaz fout ho jaey sakht gunah hai ghusal mein kisi bhi dunyavi mashgholiyat ki waja se itni taakheer karna k namaz fout ho jaey jaiz nahin hai.

Sawal: ghusal aur wuzoo mein shak karna aur zyada paani bahaana k koi jagah khushk na reh gai ho?

Jawab: ghusal aur wuzoo sunat k mutaabiq yaani 3, 3 baar jism per paani baaha lein is k baad shak karna galat hai khwah kitney bhi waswasey ayen k koi hissa khushk reh gaya hoga magr isko sheetani khyaal samjh k iski koi parwah na karain.

Sawal: ghusal e janaabat k baad pehly waly kaprey pehnna?

Jawab: aisy kaprey pehny jaa saktey hain agr un pe koi najaasat na lagi hui ho koi harj nahin hai.

Sawal: naapaki ki halat mein naakhun aur baal kaatna kesa hai?

Jawab: naapaki ki halat mein naakhun aur baal kaatna makrooh hai lekin agr naakhun aur baal dho kar kaat liye jayen to makrooh nahin hai.

Sawal: janaabat ki halat mein milna julna aur salam ka jawab dena kesa hai?

Jawab: janabat ki halat mein kisi se milna salam kehna ya salam ka jawab dena jaiz hai.

Sawal: zair e naaf baal kahan tak kaatna chahye?

Jawab: naaf se le kar raanon ki jarr tak aur peshab aur paakhaney ki jagah k ird gird jahan tak mumkin ho baal kaat dena chahye.

Sawal: gair zaroori baal aur naakhun kitny din baad kaat dena chahye?

Jawab: gair zaroori baal aur naakhun her haftey kaatna mustahb hai lekin 40 din tak na kaatney ki ijazat hai magr 40 din se zyada dair rakhna gunah hai.

Sawal: seeny k baal aur taangon ya pindliyon k baal blade se kiya saaf kiye jaa sakty hain?

Jawab: jii haan jaiz hai.

Sawal: kiya orat per bacha peda honey se ghusal farz ho jata hai?

Jawab: orat per bacha peda honey k baad usi waqt ghusal wajib nahi hota jab khoon aana band ho jaey to ghusal waajib ho jata hai.

Sawal: ghusal k baad agr koi qatra ajaey to kiya hukum hai?

Jawab: peshab ka qatra aney per dobara ghusal ki zaroorat nahi lekin agr money ka qatra aya hai to ghusal se pehly so liya ho ya peshab kar liya ho ya chal phir liya ho to bhi dobara ghusal ki zaroorat nahi lekin agr naapaki lahaq honey k foran baad ghusal kar liya na peshab kiya na soya na chala phira aur koi qatra money ka agaya to dobara ghusal laazim hai lekin qatra nikalney se pehly agr koi namaz parhi to wo ho gai.